华新社

第12章（第1页）

>

罗子富向汤啸庵道：“耐看如何，阿是（要勿）去叫俚好？”

蒋月琴接口道：“原是耐勿好（口宛），俚哚吃勿落哉末，耐去教俚保吃。”

汤啸庵道：“小干仵闹脾气，无啥要紧。

耐勿做仔末是哉（口宛）。”

罗子富大声道：“我倒还要去叫俚个局哉！”

娘姨拿笔砚来，蒋月琴将子富袖子一扯，道：“叫啥局嗄？耐末……”

只说半句，即又咽住。

子富笑道：“耐也吃起‘酱油’来哉。”

月琴别转头忍笑说道：“耐去叫罢，倪也去哉。”

子富道：“耐去仔末，我也再来叫耐哉（口宛）。”

月琴也忍不住一笑。

娘姨捧着笔砚问：“阿要笔砚嗄？”

王莲生道：“拿得来，我搭俚叫。”

罗子富见莲生低着头写，不知写些甚么。

陈小云坐得近，看了看，笑而不言。

陶云甫问罗子富道：“耐啥辰光去做个黄翠凤？”

子富道：“我就做仔半个月光景。

先起头看俚倒无啥。”

云甫道：“耐有月琴先生来里末，去做啥翠凤囗？翠凤脾气是匆大好。”

子富道：“倌人有仔脾气，阿好做啥生意嗄！”

云甫道：“耐勿晓得，要是客人摸着仔俚脾气，对景仔，俚个一点点假情假义也出色哚。

就是坎做起要闹脾气勿好。”

子富道：“翠凤是讨人（口宛），老鸨倒放俚闹脾气，勿去管管俚！”

云甫道：“老鸨陆里敢管俚？俚末要管管老鸨哉囗。

老鸨随便啥事体先要去问俚，俚说那价是那价，还要三不时去拍拍俚马屁末好。”

子富道：“老鸨也忒煞好人哉。”

云甫道：“老鸨阿有啥好人嗄！

耐阿晓得有个叫黄二姐，就是翠凤个老鸨，从娘姨出身，做到老鸨，该过七八个讨人，也算得是夷场浪一挡脚色（口宛）；就碰着仔翠凤末，俚也碰转弯哉。”

子富道：“翠凤啥个本事呢？”

云甫道：“说起来是利害哚。

还是翠凤做清倌人辰光，搭老鸨相骂，拨老鸨打仔一顿。

打个辰光，俚咬紧点牙齿，一声勿响；等到娘姨哚劝开仔，榻床浪一缸生鸦片烟，俚拿起来吃仔两把。

老鸨晓得仔，吓煞哉，连忙去请仔先生来。

俚勿肯吃药（口宛），骗俚也匆吃，吓俚也勿吃。

老鸨阿有啥法子呢？后来老鸨对俚跪仔，搭俚磕头，说：‘从此以后，一点点勿敢得罪耐末哉。

’难末算吐仔出来过去。”

陶云甫这一席话，说得罗子富忐忑鹊突，只是出神。